Şeyxülislam azan qadağasına göstərişin kommunist təfəkkürlü məmurlar tərəfindən verildiyini bildirdi

 Ölkədə azan oxunmasına qoyulan məhdudiyyətlə bağlı danışan Paşazadə bu barədə göstərişin kommunist təfəkkürlü məmurlar tərəfindən verildiyini deyərək qadağada dövlət başçısının rolunun olmadığını bildirib.

A.Paşazadə deyib ki, azana qadağa qoymaq əslində İslam dinini qadağan etmək deməkdir. Çünki azan İslam dininin əsas şərtlərindən olan namazın başlıca atributudur. “Avtomobilin hərəkət etməsi üçün benzin lazımdır, mazut olmasa parovoz getməz. Azan da namaz üçün benzin kimi bir şeydir, yəni azansız namaz mümkün deyil, namaz olmadan isə İslam dini olmaz. Ona görə də bu məhdudiyyəti tətbiq edənlər əslində ölkədə İslam dinini zəiflətməyi qarşıya məqsəd qoyublar. Ancaq mən əmin edirəm ki, bu işdə prezidentin rolu yoxdur, göstərişi verənlər başları kommunist təfəkkürü ilə işləyən məmurlardır” - deyə şeyx bildirib.

A.Paşazadə əlavə edib ki, hələ sovet dövründən işləyən bəziləri həqiqətən bacarıqlı məmurdur və öz təcrübələri sayəsində yüksək vəzifələr tuturlar. Ancaq belələrinin düşüncə tərzi dəyişməyib, onlar düşüncə tərzinə görə kommunist olaraq qalırlar və azanın yüksək səslə səsləndirilməsinə qoyulan məhdudiyyət də belə düşüncədən irəli gəlir. Şeyxin sözlərinə görə, Azərbaycanda vicdan azadlığı var, ancaq elə hadisələr baş verir ki, buna hətta sovet dövründə də təsadüf etmək mümkün deyildi: “Bəzən görürsən ki, icra başçısı səviyyəsində məmur şəxsən gedib məscidin qapısından qıfıl asır. Yaxud deyirlər ki, azan ətrafda yaşayan xəstə insanları narahat edə bilər, ekologiyaya ziddir və s. Mən başa düşmürəm, belə məmurlar niyə gedib şadlıq evlərində musiqi səslərini də məhdudlaşdırmırlar? Əgər onlar gedib şadlıq evlərində də ətrafda yaşayan əhalinin rahatlığı naminə belə qadağalar tətbiq etsəydilər, o zaman azana qoyulan məhdudiyyəti də haradasa anlamaq olardı. Biz buna etiraz etmirik, məhdudiyyət lazımdırsa, digər yerlərdə də qoysunlar. Ancaq indiki halda heç kim azan məhdudiyyəti ilə bağlı mənimlə, Qafqaz Müsəlmanları İdarəsi ilə məsləhətləşməyib, fikrimi soruşmayıb”.

Şeyx deyib ki, bəzi yerlərdə ola bilsin azanı daha aşağı səslə səsləndirmək lazım idi, ancaq onun tam kəsilməsi kimi göstərişlər qətiyyən başadüşülən deyil. Onun fikrincə, azan ətrafda yaşayan dindarların ehtiyacını təmin edəcək həddə səsləndirilməlidir: “Yəni nə həddən artıq yüksəkdən, nə də alçaqdan, normal həddə”.

A.Paşazadəyə görə, belə məsələlər dövlətin dinlə münasibətləri tənzimləyən qurumu olan Dini İşlər üzrə Dövlət Komitəsi tərəfindən tənzimlənməlidir, QMİ-nin rəyi soruşulmalıdır.

Musavat

Azeri, 10 Kasım 2009 06:53