Azana qadağanı kim qoyub?

Xəbər verdiyimiz kimi Bakıdakı məscidlərdə azanın səsləndirilməsinə yenidən məhdudiyyətlər qoyulub.
Bu gün günorta saatlarından başlayaraq paytaxtdakı bir sıra məscidlərə azanın səsləndirilməməsi ilə bağlı xəbərdarlıq edilib."Təzə Pir" məscidində azan aşağı səslə verilib. "Əjdərbəy", "Hacı Soltanəli" "Kərbəlayi Abdulla" məscidində isə məğrib azanı ümumiyyətlə verilməyib.

Onu da qeyd edək ki, azana rəsmən qadağa qoyulmayıb. Məsələ ilə bağlı Qafqaz Müsəlmanları İdarəsi araşdırma aparır və məsələ ilə bağlı müvafiq qurumlara müraciət olunacaq.

Xəbəri Qafqaz Müsəlmanları İdarəsi sədrinin birinci müavini-müfti Hacı Salman Musayev də təsdiqləyib. O, ANSPRESS-ə müsahibəsində bildirib ki, hazırda bununla bağlı araşdırma aparılır və ətraflı açıqlama sabah veriləcək.
Faktı təsdiqləyən Təzə Pir məscidinin baş axundu Hacı Faiz isə deyib ki, bu cür hal tək paytaxta deyil, bölgələrdə də baş verib. O deyib ki, ölkənin mənafeyinə zidd olan bu hal barədə aidiyyatı qurumlara məlumat veriləcək.

Xatırladaq ki, ötən gün günorta saatlarından başlayaraq, paytaxtdakı bir sıra məscidlərə azanın səsləndirilməməsi ilə bağlı xəbərdarlıq edilib. Bu barədə məlumatı ANS PRESS-ə Dini Etiqad və Vicdan Azadlıqlarının Müdafiə Mərkəzinin (DEVAMM) rəhbəri Hacı İlqar İbrahimoğlu verib. O bildirib ki, hələ dünən (31.10.09) "Təzə Pir" məscidində azan aşağı səslə verilib. Qafqaz Müsəlmanları İdarəsi sədrinin köməkçisi Hacı Rüfət də məsciddə məğrib azanının çox aşağı səslə verildiyini təsdiqləyib.

“İlahiyyat” məscidi, “Əjdərbəy” məscidi (“Göy məscid”), “Hacı Soltanəli” məscidi, “Kərbəlayi Abdulla” məscidində isə məğrib azanı ümumiyyətlə verilməyib.(31.10.09). Hacı İlqar İbrahimoğlunun sözlərinə görə, “Kərbəlayi Abdulla” məscidində azanın səsləndirilməməsinə məscidin bağlanılması ilə bağlı təhdidlər səbəb olub. Məscidin növbətçisi bildirib ki, bir neçə məmur (onların adlarını çəkməyib) məscidə gələrək, minarələrdən azanın verilməsinin dayandırılmasını tələb ediblər və tələb yerinə yetirilmədiyi təqdirdə məscidin bağlanacağı ilə hədələyiblər.

Dini Qurumlarla İş üzrə Dövlət Komitəsinin şöbə müdiri Gündüz İsmayılov isə ANS PRESS-ə açıqlamasında məlumatı nə təsdiq, nə də təkzib edib. “Məndə bu barədə məlumat yoxdur” deyən şöbə müdiri qurumun bu gün rəsmi açıqlama verəcəyini bildirib.

Onu da qeyd edək ki, azana rəsmən qadağa qoyulmayıb və məscidlərə bu barədə göstərişin qeyri-rəsmi qaydada verildiyi bildirilir.

Xatırladaq ki, 2007-ci ildə də azanın səsləndirilməsinə qadağa qoyulmuşdu. Lakin ölkə rəhbərliyinin müdaxiləsindən sonra qadağa aradan qaldırıldı.

Mövzunu davam etdirəcəyik.

ANS Press

Azeri, 01 Kasım 2009 03:12